:

Thomas Rymer, Foedera, Conventiones, Literae et cujuscunque generis Acta Publica inter Reges Angliae et alios quosvis... Tomus VII (Londini: A. & J. Churchill, 1709), pp. 231-232:

Rex dilectis et fidelibus suis, locum suum tenenti in Ducatu Aquitaniae, ac Majori Civitatis Burdegalae, Senescalloque Landarum, et Majori Villae Baionae, qui nunc sunt vel qui pro tempore erunt, necnon juratis dictarum civitatis et villae ac omnibus aliis fidelibus et subditis suis in Ducatu praedicto, ad quos etc., salutem.

Vidimus per literas bullatas Domini nostri Summi Pontificis Urbani divina Providentia Papae Sexti, nobis exhibitas, et etiam satis scimus quod idem Summus Pontifex, juris solempnitatibus observatis, contra Robertum Gebonem Antipapam et quamplures alios, tam olim Cardinales quam olim Patriarcham Constantinopolitanum, olimque Archiepiscopos, Episcopos, clericos et milites,

Qui, ut iniquitatis filii, viam justitiae deferentes et Deum prae oculis non habentes, contra ipsum DOminum nostrum Papam diversas conspirationes, colligationes, et machinationes falsas et malitiosas subdole fecerunt, et scismata in Dei Ecclesia posuerunt; et praefatum Robertum Papam nominare, dictumque Sanctissimum Patrem Dominum Urbanam Papam non esse asserere et praedicari facere dampnabiliter praesumpserunt; et ab hujusmodi excessibus desistere et ab eorum erroribus resipiscere, quamquam ad hoc per ipsum Sanctissimum Patrem, paterno zelo deductum, moniti fuerant, noluerunt,

certos processus fecit per quos declaravit ipsos omnes fuisse et esse scismaticos, excommunicatos, anathematizatos, apostatas, et blasphemos, et tanquam haereticos puniendos, praedictosque olim Cardinales a Cardinalitatibus Romanae Ecclesiae et ab omni Cardinalatus commodo et honore, praefacosque olim Patriarcham, Archiepiscopos, et Episcopos ab omnibus pontificalibus et quibuscumque dignitatibus et honoribus ecclesiasticis, et alios cleros praedictos, quibuscumque dignitatibus, personatibus et officiis, ac beneficiis ecclesiasticis, necnon dictos Milites omnibus dignitatibus honoribus et gradu Militiae ac Cingulo Militari fuisse et esse privatos ipsosque privavit,

ac eis quamplures alis poenas et sententias juxta eorum demerita imposuit, et insuper voluit quod omnes et singuli Christi Fideles, qui ad praedictorum dampnatorum captionem et exterminationem se accingerent, et eos pro posse prosequerentur, illa gauderent indulgentia illoque privilegio essent muniti quae accedentibus in Terrae Sanctae subsidium conceduntur,

dictusque sanctissimus Pater, cupiens quod praemissa omnia ad communem notitiam Christi Fidelium deducantur, ut ipsi Fideles a praedictorum perversorum astutiis praeserventur, dilecto nobis Fratri, Petro Marini, Ordinis Fratrum Minorum, Professori, in Sacra Theologia Magistro, et Apostolicae Sedis Nuncio, commisit et mandavit uatinus idem Frater Petrus fidei loricam induens et gladium spiritus qui est Verbum Dei assumens, in toto Ducatu praedicto Inquisitor Haeretica Pravitatis existat, et contra praefatos scismaticos ac dDei et ejus Sanctae Ecclesiae inimicos, tanquam verus Fidei Catholicae pugil, insurgens, tam im publicis quam in privatis sermonibus et praedicationibus, innocentiam praedicti Domini nostri Papae Urbani et Ecclesiae praedictae causam defensurus assumat,

ac idem Summus Pontifex praefato Fratri Petro ad praemissa omnia et singula et quamplura alia ea concernentia, faciendum et executioni demandandum plenam et liberam, tenore dictarum literarum, concessit facultatem, prout in eisdem literis plenius continetur,

Nos igitur, justitia moniti, volentes Domino nostro Urbano Papae praedicto contra praedictas personas detestabiles et infames, tam per Nos quam dubditos nostros quoscumque, pro omnibus viribus assistere et manus nostras apponere adjutrices, vobis mandamus districtius quo poterimus injungentes quod eidem Fratri Petro auditum pacificum in hac parte praebeatis, ac ipsum literas praedictas publicare et exponere, et de materi in eisdem contenta praedicate absque difficultate qualibet permittatis ipsumque favorabiliter pertracteris, foveatis, manuteneatis, protegatis, et defendatis in praeminis et aliis quibuscumque faciendis et exequendis, juxta traditam vel injunctam a Sede Apostolica sibi formam.

Dat. infra Palatium Regis Westmon(asterii) sub Magni Sigilli Regis testimonio, sexto die Decembris.

---

Seven Cardinals at Avignon, on March 8, 1379, issued a letter declaring in favor of Pope Clement VII and against the intrusive Bartolomeo Prignano.

 

November 14, 2013 1:17 PM

John Paul Adams, CSUN
john.p.adams@csun.edu