---

---

---

---

Berger de Xivrey (editor), Recueil des lettres missives de Henri IV Tome VI, 1603-1606 (Paris: Imprimerie Impériale 1853), pp. 433-434:

 

Henri IV, King of France, to Cardinal de Joyeuse

The Second Conclave: agreement to exclude Sauli

(Fontainebleau, May 22, 1605)

A  MON COUSIN LE CARDINAL DE JOYEYSE,  PROTECTEUR DE MES AFFAIRES EN COURT DE ROME.

 

Mon Cousin,  

Le s(ieu)r de la Palme n’arriva icy que le xiii° de ce mois avec vos lettres du xiii° du passé [April 13, 1605] , estant tombé malade par les chemins. Toutesfois je n`ay laissé de me faire lire vos dictes lettres, et mesmes le journal de vostre conduicte depuis la mort du pape Clement jusques à l'election de Leon, et de m’enquerir encores sur iceluy, du dict la Palme, des particularitez desquelles il estoit informé , dont il m’a rendu tres bon compte. Sur quoy je ne vous diray pour le present autre chose, sinon que vous ne pouviés vous gouverner et conduire plus prudemment et accortement, ny mieux selon mon cœur et pour mon contentement, que vous aviés faict en toutes choses qui s’y estoient passées. Aussy Dieu avoit beny et faict prosperer vostre labeur, comme je me promets qu’il arrivera encores au present conclave, car vous sçavés nostre but viser entierement à sa gloire et à la conservation de l’auctorité du Sainct-Siege et de la liberté de toute l'Italie. C’est pourquoy ayant sceu, par les dernieres lettres que le cardinal du Perron et mon ambassadeur m’ont escriptes, que m(onseigneu)r le cardinal Aldobrandin, avec lequel il importe à mon service et à la reputation de mes affaires que nous demeurions bien unis, s'oppose ouvertement au cardinal Sauli; et aussy que cestuy-cy est fort interessé avec les Espagnolz, j’ay voulu vous advertir par la presente, que je vous envoye par ce courrier exprés, que je desire que vous vous unissiés avec le dict cardinal Aldobanndin, autant qu'il sera necessaire de le faire, pour y former et asseurer I’exclusion d'iceluy, tant pour obliger davantage à nous le dict Aldobrandin, que pour ne tomber entre les mains et à la discretion d' une personne que l' on recognoit notoirement si affectionnée au party d’Espagne. Travaillés donc à la susdicte exclusion, et toutesfois avec le plus de discretion et prudence qu’il vous sera possible. Au reste, aprés que vous nous aurés donné un Pape, je vous escriray mes intentions sur les autres poincts portez par les dictes lettres du dict la Palme; et sçaurés, pour la fin de la presente, que j'ay receu la vostre du m° de ce mois, et que je vous recommande tousjours mes affaires : et prie Dieu, mon Cousin, qu’il vous ayt en sa saincte et digne garde.

Escript à Fontainebleau, le xxii jour de may 1605.

HENRY.

DE NEUFVILLE.

---

The portion in italics is decoded from cypher.

 

 

 

 

 

---

---