:

Noël Valois, "Le rôle de Charles V au début du Grand Schisme (8 avril-16 novembre, 1378)," Annuaire-bulletin de la Société de l' histoire de France 24. 2 (1887), pp. 247-249:

De par le roy.

A nos très chiers et feaulz amis les cardinaulz de la Sainte Eglise de Rome estans à Avignon.

Très chiers et feaulz amis, jà pieçà receumes de par vous un certain transcriupt contenant l'atestacion que nos très chiers et feaulz amis les cardinalz estans à Fondes vous envoierent sur la maniere de l'election telle quelle, ou intrusion ou sege papal, de Berthelemi qui fu arcevesque de Bar; desquelz aussi avons eu des lettres patentes de la publication par eulz faicte contre le dit Berthelemi et les choses à nous adrectaman faictes par maniere de bulle soubz ues seaulz des trois prieurs que envoiées nous ont par Corbie, nostre secretaire, faisans mencion à plain de tout le faict. Avons aussi oui la relacion de notre dit secretaire et d'autres plusieurs qui ont esté par de là, qui plenement et vray[248]semblablement nous ont dit et parlé des besoingnes, et derrainement receu les lettres tant de nostre Saint Pere Clement VIIme, nagueres cardinal de Geneve, comme de plusieurs d'iceulz cardinaulz estans à Fondes, sur la maniere et comment par de là, concordablement et par sainte et juste voie, il a esté eslu en pape, avecque celles que vous nous avez escrit sur ce meismes. Pour lesquelles lettres et autres chouses assez grant et meure deliberacion sur ce [eue], et tout veu et leu de nouvel, mesment en presence de touz les prelaz qui estoient à Paris et autres de nostre especial Conseil, que nous avons pour ce fait assembler en grant nombre, et à eulz parlé singulierement et à chascun pour soy, sur le plus estroit serement que nous leur avons peu faire jurer, que ilz nous en declareroient plenement leurs consciences sans faveur, doubt ou haine, et ce que il leur sembloit que faire devions pour le miex en seste matiere: il nous ont conseillé finablement que, comme, toutes choses attendues et bein considerées, il appert clerement de la dicte election d'icelui nostre Saint Pere Clement VIIme qu' elle soit faicte justement, en maniere deue, et selon les droiz, ce dont il appert dudit Berthelemi tout au contraire, nous nous devons tenir à celle de nostre dit Saint Pere Clement, comme la meilloure et plus louable. Sur quoy, pour ce que longuement avons deferé en ceste chouse de nous en declarer, jusques ad ce que nous eussons bien sceu de meritez de la besoingne, veu touteffois que plus atendre ou declare sur ce, très grant scisme, discorde et inconvenient s' en porroit enseuir, ce que nous voulons de tout nostre pouvoir evister, nous, pour reverence de Dieu et le bien de son Eglise, pour le meilleur et le plus sain advis, oster toutes divisions et donner à touz bon essamble de ainsi le faire, nos sommes declarés pleinement et assentiz nous tenir à celle election de notre dit Saint Pere Clement dessus nomé, et le voulons avoir et recongnoistre et congnoissons en papa et souverain pastor de l'Eglise de Dieu. Et sur ce, pour ce qu'il soit à touz notoire, avons tantost en nostre dit Conseil ordené que il soit incontinent publié et solempnisé par les eglises à Paris et ailleurs en nostre royaume ainsi et par la forrme qu'il est acoustumé de faire en tel cas. La quelle chose aussi afin que vous sachez, et nostre entencion sur ce, nous avons volu qu'il vous soit signifié par ces presentes.

Donné en nostre chastel du Bois de Vincenne, le XVIe jour de novembre

(signed) Charles.

Corbie.