:

Caesaris S. R. E. Cardinalis Baronii, Od. Raynaldi et Jac. Laderchii Annales Ecclesiastici   Tomus septimus (Lucca: Typis Leonardi Venturini 1752), sub anno 1378, no. xvi, pp. 310-311:

Urbanus, etc. venerabilibus fratribus archiepiscopo X ejusque suffraganeis, etc.

Nuper felicis recordationis Gregorio PP. XI praedecessore nostro in Urbe, ubi tunc cum sua curia residebat, sicut Domino placuit, subtracto ab hac luce, post exhibita eidem in solemnibus exsequiis debita humanitatis obsequia, venerabiles fratres nostri S. R. E. cardinales in Palatio Apostolico apud Basilicam Apostolorum principis sito, in quo idem praedecessor, dum viveret, habitabat et cursum praesentis vitae consumpserat, convenientes in unum pro electione substituendi Pontificis juxta necessitatis instantiam celebranda per eos, prius, ut est moris, Spiritus sancti gratia suppliciter invocata, ejusdem Spiritus, ut pia et devota supponit credulitas, assistente clementia, prima die, qua ad hoc invicem conveneruant, de ipsorum fratrum communi voto, raraque concordia eodem afflante Spiritu, processit de nobis tunc archiepiscopo Barensi ad Petri cathedram canonica, communis et concors electio. In his ergo stupemus non immerito pariter et terremur. Nonne stupor, nonne terror, quod nos, qui tutioris semp-er putavimus esse consilii secure in domo Domini subjici quam periculose super aliorum curam et regimen elevari, sic subito et insperato in maris altitudinem venimus?

Et dum injuncti operis sarcinae insufficientes humeros et viribus impares tanto oneri comparavimus, non indigne timebamus hujusmodi oneris molem suscipere: sed haec efficaciter suggerebant, ut in vocatione, qua nos vocaverat Dominus, maneremus, et si debilitas hujusmodi onus refugeret, et opus insufficientia vitaret. Verum quia merces laboribus commensuratur et redditur, ac proinde Doctor egregius non de fructu gloriatur, sed veraciter suos labores attestans, non ait, plus omnibus perfeci vel profui, sed plus omnibus laboravi; licet deterreat onus et labor, tamen ad subeundum jugum Apostolicae servitutis et in ea pro viribus laborandum nos merces retributionis aeternae commensuranda laboribus invitavit, et sub illius fiducia, qui lapso virtutem tribuit, sibique solus sufficienter plenitudo nostros potest supplere defectus, debiles humeros tanto subjecimus oneri, nec expavimus pro Christi fidelium animarum salute namus exponere immensitati laboris.

Caeterum, quia supra vires nostras esse conspicimus susceptum officium, illudque soli portare nequimus, orationum vestrarum suffragia humiliter imploranda, et vos in partem sollicitudinis evocatos, ut collaborando nobiscum diligentius exsequamini commissa nobis officia, decrevimus exhortandos. Ideoque universitatem vestram monemus et hortamur in Domino nihilominus rogantes instanter quatenus preces humiles ac fideles frequenter fundatis ad Dominum, ut sua pietate nostram insufficientiam suppleat, debilitatem roboret, nobisque quod est onerosum levet, obscurum suae claritatis luce revelet, et aspera convertat in plana: sicque vota nostra praeveniendo clementer aspiret, ut misericorditer adjuvando benignius prosequatur, quod zelus noster semper in ipsius beneplacito ferveat, nec unquam in illorum executione torpescat. etc.

Dat. [Romae ....]

 

 

 

 

November 14, 2013 0:57 AM

John Paul Adams, CSUN
john.p.adams@csun.edu