:

Caesaris S. R. E. Cardinalis Baronii, Oderici Raynaldi et Jacobi Laderchii Annales Ecclesiastici   Tomus septimus (Lucca: Typis Leonardi Venturini 1752) [Baronius-Raynaldi], sub anno 1378, no. XL, p. 328:

Reverendissimis in Christo Patribus dominis Petro [Corsini] episcopo Portuensi, Francisco [Todeschini] tituli San. Sabinae, Simoni [de Borsano] tit. S. Joannis et Pauli presbyteris, Jacobo de Ursinis Sancti Georgii ad velum aureum diacono, miseratione divina S. Romanae Ecclesiae Cardinalibus, Joannes [Cros] episcopus Penestrinus, Guillelmus [de Agrifolio, tit. S. Stefano in Monte Celio, Bertrandus Atgerius] tit. S Caeciliae, Robertus [of Geneva] Basilicae duodecim Apostolorum, Hugo [Hugues de Montelais] tit. SS. Quatuor coronatorum, Guido [Guy de Malsec] tit. S. Crucis in Jerusalem, Joannes [Jean de la Grange, OSB] tit. S. Marcelli, Petrus [Pierre de Sortenac] tit. S. Laurentii in Lucina, Geraldus [Gérard du Puy] tit. S. Clementis presbyteri, Petrus [Pierre Flandrin] S. Eustachii, Guillelmus [Guillaume Noellet] S. Angeli, Petrus [Pierre de Vergne] S. Mariae in via lata, et Petrus [de Luna] S. Mariae in Cosmedin, diaconi, eadem miseratione S. R. E. Cardinales Anagniae existentes, salutem et fraternae dilectionis affectum.

Cum nuper Apostolica sede vacante per obitum piae et sanctae menoriae domini Gregorii Papae XI, qui de mense martii proxime praeterito, diem suum in Urbe clausit extremum, nos una vobiscum pro electione futuri Romani Pontificis, ut juris et moris est, celebranda, in Conclavi ad hoc in apostolico palatio, in quo idem sanctae memoriae dominus Gregorius obierat, deputato convenissemus, Romani officiales cum magna multitudine armati quasi hostili more totum circumdederunt ab extra, et ab intus fere implentes palatium antedictum, et per impressionem, nedum in Urbe, verum fere ubique terrarum notoriam ad eligendum repente contra deliberationem et propositum nostrum firmum, et per metum mortis nobis palam et clare imminentis, coegerunt invitos, in scandalum maximum cleri et populi Christiani, ac exempli perniciem, nisi provideretur, fere perpetuo duraturam, ac evidens periculum animarum. Cum igitur istud factum tam scandalosum, sine macula fidei, sine scandalo cleri et populi Christiani, sine magna subversione status ecclesiae sacrosanctae, sub dissimulatione transiri non posset, volentes circa ea omnia providere, vos utique maxima, et honorabilia membra ipsius ecclesiae sacrosanctae, et ad tardius quos una nobiscum pertinet sub debito fidelitatis, quo eidem Romanae ecclesiae tenemini, requirimus vos, quanto carius possumus deprecantes, ut infra quinque dies ad postquam praesentes literas receperitis in Anagnia conveniatis una nobiscum ad deliberandum et providendum super praemissis de remediis opportunis, nec non ad tractandum et peragendum omnia et singula quae propter praemissa fuerint necessaria, seu etiam opportuna, ad salutem et utilem provisionem sanctae Romanae ac universalis Ecclesiae ac fidei orthodoxae.

Datum Anagniae anno a nativitate Domini 1378, die 20 mensis julii, primae indictionis, sub propriis sigillis.