Thomas Rymer, Foedera, Conventiones, Literae et cujuscunque generis Acta Publica inter Reges Angliae et alios quosvis... Tomus I (Hagae Comitis 1745), p. 118:
Magnifico viro Edwardo primogenito illustris Regis Angliae, karissimo consanguineo suo Karolus, Dei gratia, Rex Siciliae, Ducatus Apuliae, et Principatus Capuae, Almae Urbis Senator, Andegaviae, Provinciae et Forch(alquerii) Comes, Romani Imperii in Tuscia per Sanctam Ecclesiam Romanam Vicarius generalis, salutis et prosperitatis augmentum.
In dolore animi et maerore, tenore vero praesentium vobis intimamus, quod nuper, nobis cum magnifico Principe karissimo Domino et Nepote nostro Philippo, Dei gratia, Rege Francorum illustri in Romana Curia existentibus, maledictionis filii, Symon et Guydo de Monteforti, nec Deo, nec Romanae Ecclesiae, neque praedicto Regi Francorum, neque vobis aliquatenus deferentes, nobilem virum Henricum, primogenitum magnifici Principis, Domini Ricardi, Dei gratia, in Romanorum Regem Electi, consanguineum nostrum et vestrum, nequiter, proh dolor! trucidarunt.
Nos igitur, tantum facinus non aliter quam in prsonam nostram ac liberorum nostrorum patratum fuerit, ascribentes et proponentes ulcisci ac prosequi toto posse, Nobilem virum Henricum Comitem Waldemontis et Aniani, dilectum Consiliarium familiarem et fidelem nostrum, quem Vicarium nostrum in Tuscia generalem statuimus, contra praedictos nephandissimos, ad prosequendum et capiendum eos personaliter duximus specialiter destinandum, intendentes firmiter in exterminium et ruinam iniquorum ipsorum sic effundere et exponere totaliter vires nostras, quod, quantum medullitus scelus hujusmodi cor nostrum tetigerit, cunctis per effectum operis clareat manifeste.
Quare Magnitudinem vestram rogamus et obsecramus instantia qua possumus, quatenus non consternamini nec dejiciamini in aliquo, si placet; sed in consueta magnitudinis vestrae constantia persistatis, manentes et conservantes in terris nostris fiducialiter ut in vestris, et a nostris, vobis, officialibus et subditis, sicut placuerit, obsequi facientes.
Nos enim scribimus ut vos, sicut personam nostram, salvent, custodiant et honorent, vobisque sicut nobis in omnibus obsequantur.
Dat. Viterbii, decimo tertio die Martii, Decimo quarto Ind(ictione), Regni nostri anno sexto.
.
©2013 John Paul Adams, CSUN
john.p.adams@csun.edu